“يا موت يا مْقَطِّف سنين العمر” – قصيدة الشاعر نزار فرنسيس في رثاء القاضي نادر منصور

نزار فرنسيس*:
“يا موت يا مْقَطِّف سنين العمر
بتاخد الفيه الداء.. والداوَى
كلّن لعندك رايحين بْأمر
أعمار.. عَ أعمار.. تتهاوَى
كلّنا مْنتساوى بِقلب القبر
لاكن عند ربّي البإيدو الأمر
هونيك مش معقول نتساوَى..
***
هونيك في بعد هالرحلة حساب
هونيك في صوت السما الهادر
هونيك رح ينفتح كلّ الكتاب
وْيفرز الرابح.. عن الخاسر
هونيك رح نشلح الماضي تْراب
ونلبس تْياب النور والحاضر
هونيك أوّل وَصْلتو ع الباب
رح يْرجّ الصوت من أعلا سحاب
وْينده ع نادر.. فوت يا نادر..
***
فوت يلّي بْقْيت صاين للعهود
فوت يلّي العمر منك ما اكتَفا
فوت يا نادر ع جنّات الخلود
فوت يلّي كان مشوارك وَفا..
***
القانون بعدَك عم يحسّ بْضَياع
والقوس عم يبرد بَلا تْيابك
وْمرسوم عَ حيط العدالة شْراع
والموت مركب حامل غْيابك
أخْدَك بسَفرة ما في إلها وداع
قَطْفَك متل زهرة من حبابك
نادر.. صرختا دخل الله رْجاع
تْكَسَّر حنين الصوت ما جابك
يا عمر، يا كْتاب صفحاتو رْفاع
وْقبل الترم خلْصوا من كْتابك
كنت سيف الحق عمرو ما انباع
والحق ما بْينباع بحْسابك
ياما اشتريت بْنَخوتك أوجاع
شِلْت الظلم عن قاصد بْوابك
بتضلّ انتَ الدرب مهما ضاع
وْمهما جَرَحنا الحزن ع مْصابك
وْكل ما انحَكى بْسرّ الوَفا وانذاع
وْكل ما انْعَمَلْ للخير إستطلاع
بتترَحَّم العالم على تْرابك..”
* ألقى الشاعر نزار فرنسيس هذه القصيدة في الحفل التأبيني الذي أقيم تكريمًا للقاضي نادر منصور في قصر الأونيسكو بعد ظهر يوم الجمعة الواقع فيه 5 نيسان 2024.
“محكمة” – السبت في 2024/4/6