كلّ الحبّ إلى ابنتي سارة أبو الحسن التي خطفها طليقي/سارة عيد

سارة عيد*:
مرق عيد ميلاد بنتي الثامن.. وهو أوّل عيد بيمرق علي وما بقدر احتفل فيه ولا بجبلها هديّة ولا الكيك اللي هيي بتحبّه ونضحك سوا.
واليوم رح يمرق عيد ميلادي وما بقدر شوفها وبالعادة حتّى بعيدي لازم كمان نطفّي شمعة كرمالها قبل شمعتي.
رح يقطع تسع شهور وأنا محرومة من بنتي.
طليقي قرّر ياخدها بالقوّة وغصب عني وحرمني من شوفتها وضحكتها وريحتها.
المحاكم أعطتني حقّي
والقضاء قرّر حبس طليقي
وصدر بحقّه بلاغ بحث وتحري لأنّه ضرب المحامي وقوّص على سيّارته
بس مين بيقدر يعمل معه شي؟
مين في ينفّذ قرار محكمة؟
أيّ مخفر بيقدر يوقّف شخص هو محزّب وحزبه حاميه؟؟!
أنا بوثق بالله بس
وحزني بيني وبين ربي
بس اشتقت لبنتي
بنتي هي حياتي وشهدي
بنتي عايشة هلق مع مرت أبوها وبعيدة عن أمّها
بنتي مش مسجّلة بالمدرسة
بنتي بعيدة عن ألعابها ورفقاتها
بنتي الشهد.. مرق عيدي وعيدك بكلّ حزن وقهر
بنتي الغالية اسمها سارة فراس أبو الحسن.
كلّ عام وأنت بخير يا عمري.
*سارة عيد أمّ تسعى لاستعادة ابنتها سارة أبو الحسن ورؤيتها ومشاهدتها واحتضانها، وتجدر الإشارة إلى أنّ وكيلتها القانونية هي المحامية فريال الأسمر.
“محكمة” – الأحد في 2021/2/7