المرشح لعضوية مجلس النقابة المحامي وسيم بو طايع أمام محامي النبطية: إيماني بكم كبير لنقوم بالتغيير المطلوب
على مشارف انتخابات نقابة المحامين في بيروت يكثّف المرشّح المحامي وسيم بو طايع جولاته ولقاءاته واجتماعاته مع زملائه وزميلاته طارحًا أفكاره وتطلعاته عليهم وفتح النقاش في شؤون المهنة وشجونها.
وفتح بو طايع دارته في بلدة المعمرية – صيدا لاستقبال المحامين القادمين من محافظة البنطية كما فعل مع محامين آخرين، في دلالة واضحة على أهمية هذا الاستقبال.
وألقى بو طايع كلمة ترحيبية “بالحضور الزملاء الأحبّة”، وقال: “بدي بلّش بتحية كبيرة لنبطية منطقة مش بس أهلنا وأرضنا، إنما هي أصل الحضارة، والتاريخ، والجذور اللي منها منستمد قوّتنا وثباتنا. وجودكن هون اليوم ببيتي هو فخر كبير إلي، وبيأكد إنو الروابط بيناتنا أعمق من مجرد مهنة، هيدا بيتكم متل ما هو بيتي.”
وأضاف: “نحنا مقبلين على استحقاق نقابي مهم. انتخابات النقابة مش تفصيل، هي محطة بتكرر لكنها بتقرر مصير المهنة، وبتحدد إذا رح نضلّ نشتغل لمصلحة المحامي ونصون كرامتو، أو منترك النقابة تنجرّ ع محل ما ما بيشبه تاريخها.”
وتابع المحامي بو طايع: “أنا ترشّحت مش لوجاهة شخصية، إنما لأنو بآمن إنو صوتنا من هون، من الجنوب، لازم يوصل ع بيروت من دون أي مونتاج أو تحريف، يوصل ع مجلس النقابة، ويوصل حامل هموم كل زميل وزميلة. رؤيتي واضحة: بدنا نقابة قوية، شفافة، قادرة توقف حدّ المحامي، تطورلو صناديقو، وتوفّرلو كل وسائل الدعم، وخصوصي بظل هالظروف الصعبة اللي عم نعيشها. إيماني فيكن كبير، ودعمكن بركز عليه. سوا منقدر نكون التغيير، ومنقدر نرجّع للنقابة دورها الريادي.”
وخلص بو طايع إلى القول :” بشكر حضوركن، وبشكر ثقتكن، وإن شاء الله منكمّلن سوا بهالمسيرة، صوت واحد، كلمة وحدة، ومصلحة وحدة.”
وكان المرشّح بو طايع قد زار مركز نقابة المحامين في عدلية النبطية حيث التقى زملاءه وزميلاته، وارتجل ممثّل النقابة في النبطية المحامي شوقي شريم كلمة بالمناسبة قال فيها:” إنّ وسيم بو طايع هو إبن الجنوب وقد وقف معنا خلال فترة الحرب الإسرائيلية الأخيرة على لبنان واحتضن الكثيرين، وهو إبن عائلة قانونية ومعروفة من قبلنا جميعًا” متمنيًا له التوفيق والنجاح في مسيرته وفي الانتخابات النقابية.
“محكمة” – الأربعاء في 2025/10/1
